​ថ្មីៗ​នេះ មាន​ព័ត៌មាន​បាន​ឲ្យ​ដឹងថា ក្រុមហ៊ុន​ភេសជ្ជៈ Pepsi នឹងធ្វើ​ការប្រកាស​នូវ​ទូរ​សព្ទ​ស្មា​ត​ហ្វូ​ន​ដំបូង​របស់ខ្លួន​នៅក្នុង ប្រទេស​ចិន​ឆាប់ៗ​នេះ​។ នេះ​បើតាម​ការបញ្ជាក់​របស់​ក្រុមហ៊ុន​ប្រាប់​ទៅកាន់​សារព័ត៌មាន Reuters​។​

​ក្រុមហ៊ុន​ផលិត​ភេសជ្ជៈ PepsiCo នៅក្នុង​ប្រទេស​ចិន​បាន​សហការ​ជាមួយ​ដៃគូ​របស់ខ្លួន​ថា នឹង​ផលិត​ទូរ​សព្ទ​ស្មា​ត​ហ្វូ​ន​មួយ​ម៉ូ​ដែល​ក្រោម Brand របស់ខ្លួន​ផ្ទាល់​។ តែ​ក្រុមហ៊ុន​បាន​បញ្ជាក់ថា ទូរ​សព្ទ​ស្មា​ត​ហ្វូ​ន​នោះ​គឺ​មិនមែន​ខ្លួន​ជា​អ្នក​ផលិត​ផ្ទាល់​នោះទេ តែ​ជា​ក្រុមហ៊ុន​ដៃគូ​ទៅវិញ​។​
 
​ទូរ​សព្ទ​ស្មា​ត​ហ្វូ​ន​ដែល​គ្រោង​នឹង​ប្រកាស​នោះ​មាន​ឈ្មោះថា Pepsi P1 ដែលជា​ប្រភេទ​ទូរ​សព្ទ​មានតម្លៃ​សមរម្យ​មួយ​។ ចំណែកឯ​លក្ខណៈសម្បត្តិ​របស់​វា​វិញ តាម​រូបភាព​ដែល​បាន​បែកធ្លាយ​បានបង្ហាញ​ថា Pepsi P1 គឺ​ដំណើរការ​ដោយ​ប្រព័ន្ធ​ប្រតិបត្តិការ Android 5.1 Lollipop, បំពាក់​ដោយ​អេក្រង់​ទំហំ ៥,៥ អ៊ី​ញ​កម្រិត​បង្ហាញ 1080p , CPU ល្បឿន 1.7GHz , ទំហំ RAM 2GB , ទំហំ​ម៉េ​មូ​រី 16 GB និង​មាន​ថាមពល​ថ្ម 3,000 mAh ។​
 
​បន្ថែមទៀត​នោះ Pepsi P1 នឹង​បំពាក់​ដោយ​កាមេរ៉ា​ក្រោយ​ទំហំ 13MP និង​កាមេរ៉ា​មុខ​ទំហំ 5MP​។ ចំណែក​កម្រាស់​វិញ​គឺ​ស្ដើង​ត្រឹមតែ ០,៣០ អ៊ី​ញ​តែប៉ុណ្ណោះ​។​

​ចំពោះ​ថ្ងៃ​ប្រកាស​វិញ​តាម​ការបង្ហាញ​នៅលើ គេហទំព័រ mashable បាន​ឲ្យ​ដឹងថា Pepsi P1 ប្រហែលជា​នឹង​បង្ហាញខ្លួន​ក្នុង​ខែតុលា​នេះ​តែម្ដង​។ ចំណែកឯ​តម្លៃ​វិញ​គឺ​ប្រហែលជា ២០៥ ដុល្លារ​តែប៉ុណ្ណោះ​៕

​

ប្រភព​៖ mashable , sabay
​